Chei di Contecurte

L'Ostîr
L'Ostîr altri nol è che Rafâel Serafin (Raffaele Serafini).
Cognossût tal web come gelostellato, Cîl glaçât di une volte e Salvadeat di cumò, al trafiche dispès cu la marilenghe.
Furlan dal '75, al lavore tant che insegnant di dirit e economie tor pes scuelis superiôrs, publichis e privadis, ma i capite di insegnâ furlan ator pes mediis e di fâ il sportelist ator pes bibliotechis.
Al fâs i cartelons par l'Udin scrits par furlan, al lei libris par fruts, al scrîf contis curtis ancje par talian, al bute jù i pensîrs cuant che i capite, e di sigure al fâs cualchi altre robe che cumò no si vise. Al à vût lavorât intal mont de editorie e al lei libris di ogni sorte, cuntun voli di gale par chei di contis. Di fat, al à publicât Contis di famee e Soreli jevât a mont, vincint ancje il Sant Simon tal 2015.
La Ostarie Leterarie di Contecurte e je une creature che i dà une vore di sodisfazions.

Il Famei
Checo Tam (Francesco Tami) al è nassût intal 1963 e al è di Pavie (No, no chê di Milan...). Al è un dj colaboradôr di Radio Onde Furlane e al scrîf articui musicâi par rivistis e fanzines.
Intal 2000 al à vinçût il premi leterari San Simon pe narative cu La maree nere e altri contis e il prin premi intal concors pes senegjaturis dal CEC cun Viatores.
Altris sôs contis a son vignudis fûr su la riviste La Comugne, dulà che intal 2002 a je stade publicade la sô senegjature Ecstasy.
Tal 2002 al à publicât une opare une vore origjinâl, l’audiolibri Sense parodie des oparis di fantasience dai agns ’50. Al è ancje cjantant de gnove formazion dai Soglia del Dolore (punk band) dal 2004. Intal 2008 al vinç il Premi Friûl cul progjet Francis and The Phantoms (darkwave). Sô ultime produzion leterarie al è il libri "Scûr di lune", jessût pe KappaVu. Al è il famei de preseade ostarie di Contecurte e fidât letôr in public des contis dal Ostîr...


Il Berlon
Michêl Londar (Michele Londero), ch'al sedi di Glemone si lu capìs dal cognon... Al è dal '71 e dal 1999 al lavore come educadôr, imbastint progjets in favôr di personis cun disabilitât, par cont de AAS3 “Alto Friuli - Collinare - Medio Friuli”.
Dal 2000, cun altris siei compaesans, al à metût sù la Companie di teatri amatoriâl Dreteledrôs e di chê volte al à burît fûr cualchi spetaculut, une vore di leturis e plui di cualchi cors di fonde par condividi cheste passion e par stiçasi e stiçâ chei altris a fâ i conts cun lis propis emozions.
In tes robis che i plasin si bute cun morbìn, come tirâ sù ulîfs par fâ il vueli dulà butâ dentri i pevaroncins dal Ostîr, o pûr, tai ultins timps, mentintsi tal cjâf di zuiâ a rugby te scuadre dai vecjats (old) dai Black Ducks Rugby Gemona.

La Massarie
Margarite Cogôi (Margherita Cogoi) no sa masse ben ce che e je, e soredut no sa parcè. E sa, però, che i plâs sunâ, cjantâ e balâ, fâ confusion e che se lavoràs trop che e mangje e sarès bielzà siorissime. (Si è laureade in Siencis Internazionâls e Diplomatichis e e à cjapât il diplome di piano al Conservatori, tant par no fâsi mancjâ nuie).
A seconde dai dis e pense che la vite sedi une freadure grandonone cence sens o une fortune plene di oportunitâts.
La sô pôre e je chê di butâ vie il timp, la sê passion e je di butâsi in robis e puescj gnûfs, pene ch'e po. Ancje cuant che a somein plens di int fûr cu la cassele, come Contecurte.

La Camarele
Lussia di Uanis (Lucia Pinat) a jè di Joannis ma vîf a Mortean
Lussia a jè cumò in orbita in the sky with diamond parsè che si à inamorada.
Lussia a jè mari di doi gavanei
Lussia lavora di tancj agns cui fruts ator pa regjon e inaltrò... scrîf spetacui e puisiis
Lussia pitura monts, lei libris e contis a vôs alta, pa radio, pa lis stradis, 
Lussia a jè una Trastolona
Lussia à partecipât a diviars Poetry Slam e a' nd à ancja organizâts un Trê
Lussia à vût il plasê di colaborâ cun tancj musiciscj, in particolâr, à vût doi grops che la acompagnavin ta la letura des sôs poesîs: K'Ramar e Eletrike Skeletriche Poetiche
Lussia à fat tantis voltis pardibon la osteade (gestiva un osteria in montagna tai periodos di feriis di ches altris
Lussia fâs part da SottanePoetiche...un grop di feminis creativis
Lussia ancjamò no sa se che fasarà di granda.





Il Cjantôr
Bizio Citòs (Fabrizio Citossi) ... 




(in spiete di bio)











Il Po(l)e(n)te 
Franc Polentarut (Franco Polentarutti)

(in spiete di bio)

















E chei altris colaboradôrs

Xabi Xogrâr da Plêf
Za Garzon in seconde, inte Ostarie viere, al à metut adun la rubriche vierte Ecumène e al è stât stiçât a contribuî ancje ae rubriche ConteCjançon...

Dree Venier (Ostîr in seconde), Gianfranco Pellegrini (Garzon), Sandri Carrozzo (Camarîr),  a son colaboradôs che a àn judât a meti inpins Contecurte, cun ideis, gnovis, lezions di lenghe e leterature e contis. Pa cumò a son in feriis, ma cuissà che no tornin dongje... Intant, intes contis, tai stuzighets e tai imprescj, a si pues lei ce che a àn scrit par la nestre Ostarie.

Michela Zangarelli
E à començât a mateâ cu la programazion a 14 agns e no si è ancjemò stufade. Scoltant i desideris dal Ostîr e à metut adun la mobilie che o podês viodi. Jessint che fâ sù blogs e sîts al è il so mistîr, se cualchidun i covente la pues cjatâ e viodi i siei lavôrs su Code Monkey.

Gian De Steja
Al è un pelandron passionât di grafiche, ma al à rivât a cjatâ il timp di regalâ a cheste Osterie il banner e cualchi sbit di grafiche. Se us ves di coventâ lu cjatais sul so blog, Dio disse Kung.

Marcello Marangone
Al à regalât ae ostarie una schirie di fotografiis che a ricuardin ducj i zûcs di une volte, ma fats zuiâ ai fruts di cumò.

0 coments: