La Ostarie


La Ostarie
Contecurte e je une Ostarie Leterarie Furlane.
L'argoment di fonde al è la Conte Curte, 
une forme narative di valôr e antighe,
une maniere di contâ lis storiis frescje e juste par il web. 
In chest lûc virtuâl o din di bevi contis curtis in marilenghe,
metint dongje stuzighets peâts ae narative di pocjis peraulis.
Cheste Ostarie e je vierte a ducj chei che a àn plasê
di lei e scrivi par furlan, 
o ancje dome di imparâ a cognossilu.
L'Ostîr, i siei colaboradôrs, i contecurtârs 
a mostrin lis lôr oparis metintlis sot il judizi dai letôrs. 
Ideis, sugjeriments, parês a son simpri i benvignûts,
soredut se fats cun gracie e par miorâsi,
ma o vin gust ancje dome che si lei par furlan.

Lis ideis di fonde
Nus plasin lis contis "furlanis", e no dome par furlan;
contis che ancje se curtis, a àn pardabon une storie di contâ.
Nus plâs slontanâsi des formis narativis plui dopradis
par pandi storiis di stîl, gjenar e sensibilitât modernis.
Al sarès biel viodi une vore di coments e condivisions,
ancje dome par dî di vê let la conte,
 parcè che al è cussì che si ten vîf un blog 
e si incrès la cualitât des discussions.
Nus plâs peâ une imagjine par ogni storie, 
E nus plâs sburtâ ducj chei che a cjacarin par furlan, 
ma a crodin di no jessi bogns di scrivilu, 
a cambiâ idee, judantsi cui imprescj che il web al met a disposizion
e cui sugjeriments dal nestri Ostîr.
O pensìn che misturâ il snait des gnovis tecnologjiis cun chel des contis 
al puedi jessi une maniere par slungjâ la vite ae nestre lenghe.

Par mandâ une conte
Lis regulis par deventâ un Contecurtâr a son pocjis.
La conte e à di jessi scrite par furlan,
doprant par chel che si rive la grafie uficiâl, 
ma cun dutis lis sfumaduris  e variants de marilenghe.
E à di zirâ tor lis 2000 batudis, spazis comprendûts,
ancje se dispès o sierin un voli su la lungjece.
Gjenar e stîl de conte a son libars, baste che si conti une storie. 
Par jessi biele di lei, une conte e à di jessi biele di viodi:
il plui pussibil curade e cence falopis.
Se o vês dubis di grafie, o il plasê di vê cualchi corezion,
l'Ostîr al è ben content di dâus une man.
Par someti una conte al so judizi, 
al baste mandâle, zontade intun document di test,
ae nestre direzion di pueste: contecurte@gmail.com.
Se volês zontait ancje un file cu la imagjine.
Mandantnus la conte, 
si aciete che e vegni metude o no metude sul blog,
e che e vegni doprade in cualchi serade o publicazion, 
ma si è libars in ogni moment di fâle gjavâ o modificâle.


Une man ae Ostarie
Se sês furlans che a scrivin, o sês stuzigâts a provâ
la miôr maniere par judâ Contecurte
e je deventâ contecurtârs e scrivi contis.
Ma si dâi une man ae ostarie ancje dome leint il blog,
sparniçant ator pal web lis contis,
plasint la pagjine sul muselibri

condividint lis contis e lis iniziativis 
dal Ostîr e dai Contecurtârs.
E ancje rubrichis come Ecuméne o lets in Ostarie
a son di viodi come rubrichis viertis
dulà che un al pues dâ il so contribût.